កំពូលអ្នកលេងកីឡាវាយកូនហ្គោល Tiger Woods បានជាប់ចំណាត់ថ្នាក់ទី ១ ក្នុងចំណោមកីឡាករដែលរកចំណូលបានច្រើនជាងគេបំផុត ជាងមួយទសវត្សមកហើយ រួមទាំងកំពូលកីឡាករប្រដាល់ Floyd Mayweather ក៏ស្ថិតក្នុងចំណោមចំណាត់ថ្នាក់កំពូលទាំង ៣ រយៈពេលបួនឆ្នាំមកហើយដែរ។ ប៉ុន្តែ Floyd Mayweather បែរជាបានបញ្ចប់អាជីព ហើយលោក Tiger Woods ក៏បានរងរបួសជាទម្ងន់ទៀតផង។

ហេតុនេះហើយ យើងនឹងមកតាមដានកីឡាករ ដែលរកចំណូលបានច្រើនបំផុត ប្រចាំឆ្នាំ ២០១៦ សារឡើងវិញ ថាតើមាននរណាគេខ្លះ មកពីប្រទេសណាខ្លះ និងជាអ្នកលេងកីឡាប្រភេទអ្វី ដែលបានមកជំនួសតំណែងកំពូលកីឡាករទាំង ២ ខាងលើ ដោយយោងតាមទស្សនាវដ្តី Forbes ដូចខាងក្រោម ៖

១០. Kobe Bryant

• ប្រភពទ្រព្យសម្បត្តិ៖ កីឡាបាល់បោះ

• ប្រាក់ឈ្នួលពលកម្ម៖ ២៥ លានដុល្លារអាមេរិក

• ប្រាក់រកបានពីការថតពាណិជ្ជកម្ម៖ ២៥ លានដុល្លារអាមេរិក 

Kobe Bean Bryant បានកើតនៅថ្ងៃទី ២៣ ខែសីហា ឆ្នាំ ១៩៧៨ គឺជាកំពូលអ្នកជំនាញកីឡាករលេងបាល់បោះ និងជាអ្នកជំនួញ សញ្ជាតិអាមេរិក។ គាត់បានចំណាយពេល ២០ ឆ្នាំ ក្នុងអាជីពបាល់បោះរបស់គាត់ ជាមួយក្រុម Los Angeles Lakers នៃសមាគមន៍បាល់បោះជាតិ (NBA)។ ថ្វីត្បិតតែមានអាយុ ៣៤ ឆ្នាំក៏ពិតមែន ក៏ Bryant គឺជាកីឡាករវ័យក្មេងជាងគេបំផុត ដែលអាចទទួលបានពិន្ទុអាជីព (career point) រហូតដល់ទៅ ៣០,០០០ ពិន្ទុ។ ជាងនេះទៅទៀត គាត់បានឈ្នះពានមាសចំនួន ២ ពីកីឡាអូឡាំពិករដូវក្តៅ កាលពីឆ្នាំ ២០០៨ និង ២០១២ ទៀតផង។

៩. Jordan Spieth

• ប្រភពទ្រព្យសម្បត្តិ៖ កីឡាវាយកូនហ្គោល

• ប្រាក់ឈ្នួលពលកម្ម៖ ២០.៨ លានដុល្លារអាមេរិក

• ប្រាក់រកបានពីការថតពាណិជ្ជកម្ម៖ ៣២ លានដុល្លារអាមេរិក 

Jordan Alexander Spieth កើតនៅថ្ងៃទី ២៧ ខែកក្កដា ឆ្នាំ ១៩៩៣ ដែលលោកគឺជា អ្នកជំនាញវាយកូនហ្គោល ក្នុងអង្គការ PGA Tour មានសញ្ជាតិអាមេរិក។ គាត់គឺជាម្ចាស់ជើងឯកពីរសម័យកាល និងជាម្ចាស់ជើងឯកពាន FedEx Cup ឆ្នាំ ២០១៥ ផងដែរ។ កាលពីឆ្នាំ ២០១៦ ខែមេសា ទស្សនាវដ្តី Time ក៏បានចាត់រូបលោកជាកំពូលមនុស្សទាំង ១០០ ដែលមានឥទ្ធិពលបំផុតទៀតផង។ គាត់វាយកូនហ្គោលចូលបានចំនួន ៧២ រន្ធ ស្មើនឹងលោក Tiger Woods រហូតត្រូវបានគេចាត់ទុករូបលោកជា កំពូលអ្នកវាយកូនហ្គោលវ័យក្មេងបន្ទាប់ពី Tiger Woods ផងដែរ។

៨. Phil Mickelson

• ប្រភពទ្រព្យសម្បត្តិ៖ កីឡាវាយកូនហ្គោល

• ប្រាក់ឈ្នួលពលកម្ម៖ ២.៩ លានដុល្លារអាមេរិក

• ប្រាក់រកបានពីការថតពាណិជ្ជកម្ម៖ ៥០ លានដុល្លារអាមេរិក 

Philip Alfred Mickelson (ឈ្មោះហៅក្រៅរបស់លោកគឺ Lefty) កើតនៅថ្ងៃទី ១៦ ខែមិថុនា ឆ្នាំ ១៩៧០ ដែលលោកគឺជាកីឡាករវាយកូនហ្គោលអាជីព សញ្ជាតិអាមេរិក។ គាត់បានឈ្នះលើព្រឹត្តិការណ៍របស់អង្គការ PGA Tour ចំនួន ៤២ លើក រួមមានពានរង្វាន់ជើងឯកចំនួនប្រាំ ពានរង្វាន់ Masters ចំនួនបី (ឆ្នាំ ២០០៤ ឆ្នាំ ២០០៦ ឆ្នាំ ២០១០) ពានរង្វាន់ PGA Championship ចំនួនមួយ (ឆ្នាំ ២០០៥) និងពាន Open Championship ចំនួនមួយ។ ជាពិសេស គាត់គឺជាកីឡាករវាយកូនហ្គោល ដែលប្រើដៃឆ្វេង ទៀតផង។

៧. Cam Newton

• ប្រភពទ្រព្យសម្បត្តិ៖ កីឡាបាល់ឱប

• ប្រាក់ឈ្នួលពលកម្ម៖ ៤១.១ លានដុល្លារអាមេរិក

• ប្រាក់រកបានពីការថតពាណិជ្ជកម្ម៖ ១២ លានដុល្លារអាមេរិក 

Cameron Jerrell Newton កើតនៅថ្ងៃទី ១១ ខែឧសភា ឆ្នាំ ១៩៨៩ ដែលលោកគឺជាកីឡាករបាល់ឱប របស់ក្រុម Carolina Panthers របស់ National Football League (NFL)។ លោកត្រូវបាន គេជ្រើសរើសព្រមព្រៀង ចូលលេងក្នុងក្រុម នៅពេលដែលលោកប្រកួតលេងបាល់ឱប ក្នុងមហាវិទ្យាល័យ Auburn កាលពីឆ្នាំ ២០១១។ Newton គឺជាកីឡាករមួយរូបគត់ ប្រចាំសម័យទំនើប ដែលបានទទួលពាន Heisman Trophy រួមទាំងឈ្នះការប្រកួតពានរង្វាន់ជើងឯកជាតិ និងចូលជាសមាជិកពេញសិទ្ធិ NFL ត្រឹមតែរយៈពេលមួយឆ្នាំប៉ុណ្ណោះ។

៦. Novak Djokovic

• ប្រភពទ្រព្យសម្បត្តិ៖ កីឡាវាយកូនបាល់ (Tennis)

• ប្រាក់ឈ្នួលពលកម្ម៖ ២១.៨ លានដុល្លារអាមេរិក

• ប្រាក់រកបានពីការថតពាណិជ្ជកម្ម៖ ៣៤ លានដុល្លារអាមេរិក